കണ്ണൂരിൽ സിൽവർ ലൈൻ സർവേ വീണ്ടും തുടങ്ങുന്നു; എടക്കാട് സംഘർഷത്തിൽ 2 സിപിഎം പ്രവർത്തകർക്കെതിരെ കേസ്

കണ്ണൂർ: സംഘർഷങ്ങളെ തുടർന്ന് നിർത്തിവച്ച സിൽവർ ലൈൻ (silver line)അതിരടയാള കല്ലിടൽ (stone laying)കണ്ണൂരിൽ(kannir) ഇന്ന് വീണ്ടും തുടങ്ങും. കണ്ണൂരിൽ  കെറെയിൽ കല്ലിടൽ ഇന്ന് പുന:രാരംഭിക്കുമെന്ന് ഉദ്യോഗസ്ഥർ അറിയിച്ചു. കഴിഞ്ഞ ദിവസം സംഘർഷം ഉണ്ടായ എടക്കാട് പൊലീസ് സ്റ്റേഷൻ പരിധിയിലാണ് ഇന്ന് സ‍ർവ്വേ നടക്കുക. കഴിഞ്ഞ ദിവസം ഇവിടെ കല്ലിടാനെത്തിയവരെ തടയുകയും അതിരടയാള കല്ലുകൾ കോൺ​ഗ്രസ് പ്രവർത്തകർ പിഴുതെറിയുകയും ചെയ്തിരുന്നു. ഇതിനെതിരെ രം​ഗത്തെത്തിയ സി പി എം പ്രവർത്തകരും കോൺ​ഗ്രസ് പ്രവർത്തകരും തമ്മിലാണ് സംഘർഷം ഉണ്ടായത്. കോൺ​ഗ്രസ് പ്രവർത്തകർക്ക് മർദനമേൽക്കുകയും ചെയ്തിരുന്നു. 

എടക്കാട് കോൺ​ഗ്രസ് പ്രവർത്തകർകരെ മർദിച്ച സംഭവത്തിൽ പരാതിയുടെ അടിസ്ഥാനത്തിൽ സിപിഎമ്മിന്റെ രണ്ട് പ്രവർത്തകർക്കെതിരെ പൊലീസ് കേസ് എടുത്തു. ഏരിയ കമ്മറ്റി അം​ഗം പ്രകാശൻ, അശ്വന്ത് എന്നിവർക്കെതിരെ ആണ് കേസെടുത്തത്. അതിനിടെ നടാൽ നെട്രോൾ പമ്പിന് സമീപം സ്ഥാപിച്ചിരുന്ന മൂന്ന് അതിരടയാള കല്ലുകൾ രാത്രിയിൽ ആരോ പിഴുത് മാറ്റിയിട്ടുണ്ട്.

ഇതിനിടെ എടക്കാട് സംഘർഷത്തെ ന്യായീകരിച്ച് സി പി എം നേതൃത്വം ഇന്നലെ രം​ഗത്തെത്തിയിരുന്നു. അടി കൊള്ളാൻ ആയു യു ഡി എഫ് പ്രവർത്തകരും ബി ജെ പി പ്രവർത്തകരും ചെല്ലരുതെന്നായിരുന്നു സി പി എം സംസ്ഥാന സെക്രട്ടറി കോടിയേരി ബാലകൃഷ്ണന്റെ പ്രതികരണം. കല്ലിടുന്ന പ്രദേശത്തെ സ്ഥലം ഉടമകൾക്ക് പരാതി ഇല്ലെന്നും കോൺ​ഗ്രസ് പ്രവർത്തകർ മന:പൂർവം പ്രശ്നം ഉണ്ടാക്കുകയാണെന്നുമായിരുന്നു സി പി എം കണ്ണൂർ ജില്ല സെക്രട്ടറി എം വി ജയരാജന്റെ പ്രതികരണം

​ഗുണ്ടകളേയും പൊലീസിനേയും ഉപയോ​ഗിച്ച് പ്രതിഷേധങ്ങളെ അടിച്ചമർത്താനാണ് സി പി എമ്മും സർക്കാരും ശ്രമിക്കുന്നതെന്നായിരുന്നു പ്രതിപക്ഷ നേതാവ് വി.ഡി.സതീശന്റെ പ്രതികരണം. സിൽവർ ലൈനിനെതിരായ സമരം തുടരുമെന്നും കല്ലുകൾ പിഴുതെറിയുമെന്നും വി ഡി സതീശൻ വ്യക്തമാക്കിയിരുന്നു