സി.സി.ടി.വിയില്‍ നഗ്നനായി ഓടുന്ന ദൃശ്യം, മൂക്കിലും ചെവിയിലും രക്തം; യുവാവിന്‍റെ മരണത്തില്‍ ദുരൂഹത
സ്വന്തം ലേഖകൻ 
തൃപ്പൂണിത്തുറ (എറണാകുളം): ഇരുമ്ബനത്ത് യുവാവിനെ ദുരൂഹ സാഹചര്യത്തില്‍ റോഡരികില്‍ മരിച്ചനിലയില്‍ കണ്ടെത്തി. തൃപ്പൂണിത്തുറ തെക്കുംഭാഗം ചിത്രാ നഗറില്‍ മൂര്‍ക്കനാട്ട് പരേതനായ ശ്രീനിവാസന്‍റെ മകന്‍ മനോജിനെയാണ് (40) മരിച്ചനിലയില്‍ കണ്ടത്.
ഇരുമ്ബനം റിഫൈനറി റോഡരികില്‍ തണ്ണീര്‍ച്ചാല്‍ പാര്‍ക്കിന് അടുത്താണ് വെള്ളിയാഴ്ച രാവിലെ ഒമ്ബതരയോടെ മൃതദേഹം കണ്ടത്. മൃതദേഹത്തിന്‍റെ മൂക്കില്‍നിന്നും ചെവിയില്‍നിന്നും രക്തമൊഴുകിയ നിലയിലായിരുന്നു. കാല്‍മുട്ടിനു താഴെ മുറിവും പോറലേറ്റത് പോലെയുള്ള പാടുകളുമുണ്ട്. നഗ്നനായി ഓടുന്ന ദൃശ്യം സമീപത്തെ സി.സി.ടി.വി കാമറകളില്‍നിന്ന് ലഭിച്ചതായി പൊലീസ് പറയുന്നു.
വ്യാഴാഴ്ച രാത്രിയായിട്ടും മനോജിനെ കാണാതിരുന്നതിനെ തുടര്‍ന്ന് വീട്ടുകാര്‍ വെള്ളിയാഴ്ച രാവിലെ തൃപ്പൂണിത്തുറ ഹില്‍പാലസ് പൊലീസില്‍ പരാതി നല്‍കിയിരുന്നു. കളമശ്ശേരി മെഡിക്കല്‍ കോളജിലുള്ള മൃതദേഹം ശനിയാഴ്ച പോസറ്റുമോര്‍ട്ടം നടത്തും. മരിച്ച മനോജ് പെയിന്റിംഗ് തൊഴിലാളിയാണ്. മാതാവ്: ലീല. സഹോദരങ്ങള്‍: ബാബു, വിദ്യ, പരേതരായ ശ്രീകുമാര്‍, വിജയകുമാര്‍.
