ഹിന്ദുവായാലും മുസ്ലിമായാലും ഒരു കുട്ടി മതി -കേന്ദ്രമന്ത്രി
ramdas athavale
സ്വന്തം ലേഖകൻ 
അഹ്മദാബാദ്: രാജ്യത്തിന്‍റെ ജനസംഖ്യ കുറക്കാന്‍ 'നാം ഒന്ന്, നമുക്ക് രണ്ട്' എന്ന നയം സ്വീകരിക്കണമെന്ന് കേന്ദ്രമന്ത്രി രാംദാസ് അതാവാലെ. സാമൂഹിക നീതി വകുപ്പ് മന്ത്രിയും റിപ്പബ്ലിക്കന്‍ പാര്‍ട്ടി നേതാവുമായ അതേവാല പാര്‍ട്ടി പ്രവര്‍ത്തകരോട് സംസാരിക്കവേയാണ് പരാമര്‍ശം.
ഇന്ത്യയില്‍ ഭരണഘടനയും മതേതരത്വവും നിലനില്‍ക്കുന്നത് ഹിന്ദുക്കള്‍ ഭൂരിപക്ഷമായതിനാലാണെന്ന ഗുജറാത്ത് ഉപപ്രധാനമന്ത്രി നിതിന്‍ പേട്ടലിന്‍റെ പ്രസ്താവനയോട് പ്രതികരിക്കുകയായിരുന്നു അതേവാല. ഹിന്ദുജനസംഖ്യ കുറയുകയാണെന്ന വാദം ശരിയല്ലെന്ന് അതേവാല പറഞ്ഞു.
''ഹിന്ദു ജനസംഖ്യ കുറയുകയാണെന്ന് ഞാന്‍ വിശ്വസിക്കുന്നില്ല. ഹിന്ദുക്കള്‍ ഹിന്ദുക്കളായും മുസ്ലിംകള്‍ മുസ്ലിംകളായും നിലനില്‍ക്കും. ചിലപ്പോള്‍ ഏതാനും മുസ്ലിംകളോ ഹിന്ദുക്കളോ മതം മാറിയേക്കാം. നിര്‍ബന്ധിത മത പരിവര്‍ത്തനം മാത്രമാണ് തെറ്റ്. ഹിന്ദുക്കളുടേതായാലും മുസ്ലിംകളുടേതായാലും ജനസംഖ്യ നിയന്ത്രിക്കണം. ഒരു കുട്ടിയെന്ന നയം സ്വീകരിച്ചാല്‍ ജനസംഖ്യ നിയന്ത്രിക്കാനാകും. 'നാം രണ്ട്, നമുക്ക് രണ്ട്' എന്നതാണ് ഇപ്പോഴത്തെ മുദ്രാവാക്യം. ഇത് ചുരുക്കി 'നാം രണ്ട് , നമുക്ക് ഒന്ന്' എന്നാക്കി മാറ്റണം'' -അതേവാല പറഞ്ഞു.
