ഡിജെ പാര്‍ട്ടി ദൃശ്യങ്ങളുടെ ഡിവിആര്‍ കണ്ടെത്താന്‍ ഊര്‍ജിതശ്രമം; തേവര പാലത്തിന് സമീപം തിരച്ചില്‍
Anoop 
കൊച്ചി: മോഡലുകളുടെ അപകടമരണവുമായി ബന്ധപ്പെട്ട കേസില്‍ ഹോട്ടലിലെ ഡി.വി.ആര്‍. കണ്ടെത്താന്‍ പോലീസിന്റെ പരിശോധന. കൊച്ചി തേവര കണ്ണംങ്കാട്ട് പാലത്തിന് സമീപമാണ് ബുധനാഴ്ച വൈകിട്ടോടെ പോലീസ് പരിശോധന ആരംഭിച്ചത്. ഹോട്ടലിലെ സിസിടിവി ദൃശ്യങ്ങളടങ്ങിയ ഡി.വി.ആര്‍. ഇവിടെ ഉപേക്ഷിച്ചതായി ചില ജീവനക്കാര്‍ മൊഴി നല്‍കിയിട്ടുള്ളതായാണ് വിവരം. ഇതിനെത്തുടര്‍ന്നാണ് ജീവനക്കാരെ ഇവിടെയെത്തിച്ച് തിരച്ചില്‍ തുടരുന്നത്.
ഡി.ജെ. പാര്‍ട്ടിയുടെ ദൃശ്യങ്ങളടങ്ങിയ ഡി.വി.ആറാണ് പോലീസിന് ഇതുവരെ കണ്ടെടുക്കാന്‍ കഴിയാത്തത്. കഴിഞ്ഞദിവസം ഹോട്ടലുടമയായ റോയി വയലാട്ട് ഒരു ഡി.വി.ആര്‍. പോലീസിന് കൈമാറിയിരുന്നു. എന്നാല്‍ ഇതില്‍ ഡി.ജെ. പാര്‍ട്ടിയുടെ ദൃശ്യങ്ങളുണ്ടായിരുന്നില്ല. ഈ ദൃശ്യങ്ങളടങ്ങിയ ഡി.വി.ആര്‍. റോയി നശിപ്പിച്ചെന്ന് തന്നെയാണ് പോലീസ് നല്‍കുന്ന സൂചന. ഇതിനിടെ ബുധനാഴ്ച രാവിലെ റോയിയെ നമ്പര്‍ 18 ഹോട്ടലില്‍ എത്തിച്ചും പരിശോധന നടത്തിയിരുന്നു. ഇവിടെനിന്ന് ജീവനക്കാരുടെ മൊഴിയെടുക്കുകയും ചെയ്തു. ഈ അന്വേഷണത്തിലാണ് ഡി.വി.ആര്‍. തേവര പാലത്തിന് സമീപം ഉപേക്ഷിച്ചതായുള്ള സൂചനകള്‍ ലഭിച്ചത്.
